Für einisch ä Wuchebricht uf bärndütsch

……….u plötzlech, viu z’schnäu, isch alles scho wider verby: die letschti Biketour unfallfrei überstande, äs letschts Mittagässe dusse uf dr Terasse u äs letschts mau Velo putze bis alles blitz blank isch u glänzt. U bevor mr äs letschts mau zäme gö ga z’Nacht ässe luege ni nomau zrügg; zrügg uf ä Wuche Bikeferie ir Toscana.

einige Bilder >>>

Dr Wuchebricht vor Marlyse

Gruppeiteilig
Me het sech säuber müesse ischetze u sech für di schnäui oder di chli weniger schnäui Gruppe entscheide. Dr Märsu als Guide vor schnäue Gruppe het de grad nach äm Tschiggalino ir erschte Schtygig ä chline Belaschtigstescht gmacht. U nächhär isch d’Gruppeiteilig schüstiert worde; sorry Joe…Die Gruppeiteilig isch aber nid fix gsi u me het jede Tag wider chönne wähle ob mes e chli gmüetlecher wot aga oder e chli schnelleri u schwirigeri Sache fahre.

Was si Schöpf?
Üser Bärneroberländer-Kollege hei üs Schtadtbärner das müesse erkläre. Schöpf si Chempä oder für die Usserkantonale: Schtei. U Schöpf hets Schwetinä gha uf Elba. Die chline wo äm Köbi bi sim Schturz der Unterarm verchrauet hei (äs het brutal schpektakulär usgseh) u diä grosse, wo üs i dä Abfahrte düregschütlet hei äs Gott erbarm.

Born to be wild
Nid „easyride“ isch hüt agseit; „freeride“ heisst s’Zouberwort. Für zwe Schtund ghöre mer ou ä mal zu dene wo vo üs schüsch eigentläch belächlet wärde. Nämlech zu dene, wo sich mit äm Outo lö la ufe Hoger ufe füehre u nachhär wie die Picktä abeheize. U äs isch sicher ä guäti Idee gsi, dass dr Housi nach vier Abfahrte gseit het „es isch gnue“; simer doch bi jedere Abfahrt no chli höcher id Schteilwandkurve ufe gschtige, hei d Wäueli noch chli schöner usgfahre und si no chli zackiger dür d Kurve gfreset. Es het haut scho no Spass gmacht   :-)

Single Trails
Isch öpper no nie e Single Trail gfahre? Oder muesch zersch stundelang im Wald ga sueche bis es Wägli fingsch wo so ähnlech usgseht? Ja? De chumm nach Massa Marittima u du wirsch schtuune. Hie hets Single Trails i allne Schwirigkeitsgrade bis zum abwinke. U wär bis am Donnschtig no nid gnue bercho het, isch am Frytig mit em Märsu no mal die schönschte ga inezie. Steil zdüruf u rasant zdürab, links u rächts u wider e Wälle; es isch….. mega geil u Adrenalin pur   :-)

Lack und Leder
Nei, äs chunnt nüt azüglechs. Und äs geit ou nid um Lagg oder Läder; äs geit um Latex. D’Wahrheit isch as Tagesliecht cho, wo d’Marlyse dr obligatorisch Pladi izoge het. Was isch underem Pnö fürecho? Nei, nid ä gwöhnleche Gumischluch wie nä aui hei; aus Frou fahrt me mit Latex ume. U so öppis regt natürlech d’Fantasie scho no a…

Pleiten Pech und Pannen
Das Kapitel wird, zum Glück rächt churz. Klar hets dr einti oder anderi Pladi gä u o es paar spektakurläre Abflüg id Büsch hei nid gfählt. Aber meh als es paar Chräble u es paar blaui Mose hets zum Glück nid gä. U wes de doch emal ä chli meh blüetet het, si d’Guides mit em Merfenfläschli scho zur Stell gsi.

U was seit ächt de d Waag deheimä?
Der Salvo het diä ganzi Wuche aues gä. Äs mega Zmorge Büffee und ä Viergänger zum Znacht. Z’Menü het är üs aubä zersch uf Italiänisch vortreit und wüu das die wenigschte verschtande hei het ärs de o no uf Dütsch wiederholt. Mit Wort chunnt me hie nid wyter; das mues me säuber ä mau gseh, ghört und vor auem gässe ha.

Was no?
A ja, das interessiert ja immer alli; z’Wätter. Auso da gits eigentlech o nid viu zäge. Es isch halt eifach immer schön gsi. U wo mr verno hei, dass es ir Schwyz no mal so richtig chalt u grusig isch worde, hei mr d’Sunne u dr balui Himmel no grad eis meh gnosse.

Näbscht em Bike u Ässe het me o no gnue Zyt gha für e chli d’Landschaft, d’Umgäbig u d’Ferie z’gniesse. We mr nid grad uf dr Tagestour oder uf Elba si gsi, isch dr Namittag gäng frei gsi. Die wo hei wölle si o no zum Wypuur gange oder hei ere Ölmühli e Bsuech abgstattet.

.... u plötzlech, viu z’schnäll, isch alles scho wider verby. Jetz bliibt nume no eis: Merci zäge. Merci Housi, Erika u Märsu für die tiptoppi Organisation u für die super schöne Toure. Merci em ganze Team vom Tschiggalino für dä iwandfrei Service u em Savlo für sini nid immer ganz kaloriearme Menüs. Merci o de andere Teilnämer u Teilnämerinne. Es isch schön gsi, mit Euch zäme die Wuche z’verbringe. Öb mr äch wider emal hie ane chöme? I gloube d’Antwort isch nach dere Wuche klar:   :-)

einige Bilder >>>