Bericht Bike-Woche il Cicalino: 06.-14. Juni 2008

Scho glii isches sowiit und packt han i au scho sit em Mäntig! Es chan los goh!
Bi irgendwie gspannt wie e Fädere was idere Wuche uf mi zuechunt. Toskana tönt schomol irrsinnig guet. Warmi Wätterverhältnis, das nach tagelangem aahaltende Räge i de Schwiiz. De Optimismus het mi bis zur frühedämmrige Abfahrt nümme losgloh. Nach 7 ½ Stund Autofahrt durch Italie bin i de schön brav im il Cicalino iiigfahre. Zum Erstuune, mer send mit riesige Tropfe und das massehafter Natur im süscht eher trockene Maremma-Gebiet Willkomme gheisse worde. Ouwaya han i mer dänkt... das chan jo füecht-fröhlich wärde.

einige Bilder >>>

  Sonja Schnider i dr Toscana

Scho bald het sich s’einti und s’anderi ebefalls i de Réception iigfunde. Bereits det sind, ohni die Persone vorgängig zkenne, hie und da die erschte Sprüchli gfalle. Wie viel Lüüt send ächt mitdebiii? Isch mer dure Chopf gschosse. D Teilnähmer send de bald nach em Bezug vo de uuu schöne Behusige vor Siite Erika und Housi, Reiseverastalter, mitemene Apélöli begrüesst worde. Churzi allgemeini Informatione bezüglich Tourenabfahrte, Mittagässe, Obigässe und Bsunderheite händ mi ufene abwächsligsriichi Wuche dra häregfüehrt.

Üses Trüppli het sich us 11 Teilnähmer zämegsetzt. Dodezue d’Erika, d’Daniela und de Housi Beer wo en oberus geniali Guide-Arbeit gleischtet händ. Sogar s’Grossmüeti Käthi isch uf de Matte gstande. Zum erschte gmeinsame Obeässe sind de die erschte Kontäkt entstande. Vo dem Ziitpunkt a, han i gwüsst es wird e uuu gueti Ziiit! Lache isch jede Tag scho fascht ar Tagesornig gsi.

D’EM isch im Gange.... de Uftakt vom Schwiiizer-Match händ mis und vor allem mim ebefalls fuessballinteressierte Oscht-Schwiizer-Gspändli Daniela’s Härzli höcher lo schloh! Mit de gwüsse Schwiizer-Artikle wie Fähnli, Huet und Schal händ mer aber zu dem Ziitpunkt no biz zuegwartet. Erscht im nachhinein isch enand priisgeh worde, dass mer beidi settigi Artikle id Toskana mit brocht händ. Genau diesäbe sind de bim 2te Match ohni Hemmige agleit worde...
Das het Ufmerksamkeit erzügt. Nachdem üsi Kollege us em grosse Nochberskanton (Deutschland) miterläbt händ, wie fescht resp. solidarisch mer mit em deutschen Reiche mitgfieberet händ, het sich am Mittwuch e luschtigi Konstellation ergäh. Der einti het sich bereit erklärt, dass er üsi Utensilie wird aalegge und Hopp Schwiiz rüefe. Das mit em Fahneschwinge müesst me de rein technisch no bizli mit ihm aaluege... isch es Detail, süscht aber Chapeau!

Die erschti Tour isch vor üs gstande... und het ca. 2 ½ Std. duured. Es quasi Iifährtli het mer das gnennt. I muess vorussäge, dass i deheime vor allem Rennvelo fahre, falls i mol gang go bike, so wähli de de nume grad breiti Fäld- oder Waldwäge us. Bi en richtigi Memme worde, nachemene Sturtz mit brochenem Rippi (ähnlich wie d’Susi Palack)! De erschti Versuech scho bi schmalere Wägli het mi innerlich bizli lo verchrampfe und han vergässe z’Schnufe. Die Symptom sind aber de scho glii verfloge. De Grund dezue isch will i, i nere Gruppe mitfahre...
Was das usmacht isch jo unglaublich! Gliii han i gmerkt, das es mir wieder viel Spass bereitet... hie und da, gibes jo zue, bin i halt de gliich abgstiege, das het aber em Grüppli nid allzu viel usgmacht. Danke eu allne!!! D’Gruppe-Dynamik isch bis und mit zur dritte Usfahrt de Hammer gsi. Alli händ welle mitenand fahre... es isch au souverän ufgange... i glaube die diffigere Fahrer händs amix au chli gnosse... denn es Schnufpäuseli zieht jedes gärn mol ine. S’Ruth isch de richtig iifallsrich worde und het sich Mitti Wuche es Velo mit Geh-Hilf aagschafft. Das het für mi zur Folg gha, dass wenn’s Bärguf gange isch... mi s’Ruth mit tösendem Ton het afo überhole. De Clou vom Ganze: erscht no mit sehr ufrächter Haltig uf em Bike! I han derwile fascht i Länker bisse.... de Ton chunnt mer öppe mol wieder i mine Ohrmuschle zum Vorschiin und i muess vor mi ane grinse!

Insgesamt bin i idere Wuche 4x on Tour mit em Bike gsi, sogar d’Tagestour as Meer han i nach zwöi Stürtz ohni grosses Murre... nei eher.... Autschla, wiitersgfahre. Sackstark für mini Begriff! Hehehe.... mis memmelige Getue zu Beginn vor Wuche, het sich nach geraumer Ziit afe wandle. Jede Tag han i dezueglernt und de Muet zum losfahre isch zuenämends wieder i mini Bluetbahne gstiege!

En eimaligi Bade-Session im Hotelareal, han i dank em Good-Will vom Stegi dörfe erläbe. Am Mittwuch isch’s’Sünneli guetgstimmt gsi... und es het sich glohnt, chli z’si! I bin härzlich ufgfordered worde... bi de Mitgspändlis dörfe am Pool, mini Füdli-Churzschwingete dürezfüehre... klar isch de für mi Quintessänz dursuse entstande.... i bringe für’s gmüetlichi Ambiente no biz z’doppe….
mini poschtete 2 Fläsche Wiiis-Wii mit. Diesäbe händ mer aso z’paartehoch am Nami killt. Au s’Ärdmannli Gody het nach erschtem Naserümpfe souverän mitgholfe! Danke für Dini Überwindigskünscht!

Gärn han i nach getaner Asträngig im Salvo, sini würkli oberus sagehafte Chochkünscht, buechstäblich i mi ine verschlunge. Jede Tag e wahri kulinarischi Surprise...!!! Es war e Traum! Zunere würkliche Freud het sich jewils z’Nachtässe für mi entwickled. Die tägliche andere Variatione mit grosser Liideschaft zuebereitet --- eifach en Schmaus!

Die beide Usflüg, einersits d’Wiidegustation sowie de Bsuech bide Öl-Mühli het e uuu gueti Kombination zum sportliche Aspekt ergäh. Die Italiäner händs voll im Griff d’Lüüt z’verwöhne. Eis weiss i, verhungere würd me nie! Da mini Italienischkenntnis nid würkli ussagekräftig sind... probiert me sich mit de Händ zverständige und do schau her --- luschtigerwiis wird me debii verstande!

Gschwindeli, weideli isch die Wuche a mir verbii zoge... und scho bald hets uf Wiederluege gheisse....
Viel Erinnerige chömed jetzt i mer uf. D’Verarbeitig isch im Gange..... e schöni Ziiit isch’s gsi mit MTBeer im il Cicalino!

I möchte mi dodemit bi de Erika, Housi, Daniela und allne Teilnähmer:
Renner, Stegi, Gody, Daniela, Nicole, Marianne, Hene, Ruth, Urs, Gabriela ganz härzlich bedanke!
Ehr alli händ mi idere Wuche buechstäblich mittrait und für mi e bedütendi Rolle gspielt!
So dass, es mir jetzt weh tuet, denn i bi wieder deheime!

einige Bilder >>>

DANKE 1000ig!

d’Sonja